PERADATEN KALAK KARO KERNA KEMATEN

Erpalasken penatapen kalak Karo, kegeluhen i bas doni pertibi lit 7 (pitu) tepap kerna kematen, e me kap:
1. Gara-gara
2. Danak-danak
3. Erlajar mejile
4. Enggo parang/pangke
5. Parang mbelin
6. Tua-tua
7. Kolihen

1. GARA-GARA
E me mena tubuh nari, megara denga kin tuhu, pengkebetna: minem, tunduh, tangis, tawa -- ikataken, iagati apungna

2. DANAK-DANAK
Enggo ietehna tawa-tawa ras guro-guro, man-minem, meriah-melungen-nterem, nande-bapa, kaka-agi.

3. ERLAJAR MEJILE
Enggo meteh mejile, tapi lenga payosa kal ngayakken jilena, tangkel mejinna. Si dilaki majuken baju bapana, bage pe make saluar kakana, lit ka pe nama ageng jadi gumis ntah janggutna. Bage ka si diberu, erlayam, erkebaya, ergonje,ibuatna paken nande ras kakana, mawen-mawen ertudung ka ia.

4. ENGGO PARANG/PANGKE
Enggo meteh kerna uga kin mejile (enggo dewasa), ikataken anak perana man si dilaki, singuda-nguda man si diberu. Kalak Karo ngataken maka si dilaki e me kite-kite ku kalimbubu, si diberu e me jile-jile ku anak beru.

5. PARANG MBELIN
E me perbapan ras pernanden. Teman arih, teman ersukuten. Enggo bengket ku adat sangkep nggeluh.

6. TUA-TUA
Enggo erkempu, lanai megegeh, man-minem lanai ntabeh, tapi terakap denga jadi penggurun, terlebih pe jadi penungkunen i bas jabu.

7. KOLIHEN
Pengkebetna mulihi bagi danak-danak ndube, megati pe ikataken enggo nggawer2 abu ntah erciken sudu.

 Ibas kita kalak Karo mbue kal terbegi belas-belas kerna kematen, umpamana:
- Enggo mate
- Enggo metua
- Enggo keri beras ni jemputna
- Ngolih ku Dibata
- Enggo mulih ku asalna
- Enggo ngobah ngeluk
~~~~~~~~~~~~~~~~~~~
SI GENDUARI:
- Idilo Dibata
- Kembali ku Dibata.

Erpalasken tepap-tepap kegeluhen bage pe umur, kematen i bas kalak Karo lit piga-piga erbage, e me kap:

1. MATE SOPE ERBERAS
Mate gara-gara denga, lenga turah ipenna. Kematen si bagenda rupana labo ipembarken, la ipepulungken. Erbuni-buni i bas nguburkenca, inganna pe irahasiaken (labo i bas pendawanen) gelah ola itangko kalak, lako ijadiken "pupuk". E maka berngi nge ibuniken, i teruh karang/ranting ntah i reba... Adi enggo lewat umurna 8 wari banci ikuburken i bas kuburen si nterem. Bangke ibungkus alu selambar dagangen, jenari itama ku bas sumpit rikut ras nakan sempukul ras sada belo cawir, e maka ikuburken. Lit ka gelarna "MATE BUTARA GURU" e me keguguren enggo kenca erdaging nguda 3 bulan, lenga itandai dilaki ntah diberu. "MATE BICARA GURU" e enggo itandai dilaki ntah diberu. Duana enda arus erbuni-buni/irahasiaken ngkuburkenca.

2. MATE SOPE MBELIN
E me paksa anak2 denga, paksa meriah denga. Ikuburken i pendawanen ope lenga ciger. Naruhken nakan kenca 4 wari ikuburken, e me kap nakan si itama i bas perakan, bengkauna paha manuk mbelin ras calung inganna minem, igantungken ibas buluh i babo kuburen.

3. MATE PARANG (ANAK PERANA), MATE TUNGKUP (SINGUDA-NGUDA)
Ibas kematen anak perana, i babo mayatna iawatken buluh sempul2 (sengawan buluh nguda), gelah beguna pagin ola ndiloi ntah pe nise2 nandangi singuda-nguda si nggeluh, erbahanca ia sakit-sakiten ntah seh mate ka.

4. MATE I BAS TEGUN LOLO
Mate nadingken anak sope njabuken bana, subuk si dilaki ntah pe si diberu, amin gia enggo me lit erjabu, tapi lit denga si lenga erjabu. I jenda igalari utang adat man Kalimbubu (sapu-sapu iluh/uis julu/bulang-bulang).

Kematen rikutken perpate, ntah pe dalanna maka ia mate, lit ka erbage-bage gelarna..., e me kap:
1. Mate pinakiten
2. Mate cawir metua
3. Mate nguda
4. Mate sada wari.

1. MATE PINAKITEN
Kentisik ntah ndekah pinakiten, tapi lanai tertambari.

2. MATE CAWIR METUA
Erkiteken umur enggo metua, man-minem lanai ntabeh, tunduh pe lanai ntabeh, gegeh pe enggo kurang kal. Erkai pe lanai ngasup, teridah tempa sakit2en, piah mutus/mate, bagi lampu keri minakna.

3. MATE NGUDA
Enda khusus kematen pernanden si paksana natang tuah ntah pe mate mupus. Adi mate ibas natang tuah, beltekna arus isayat, anak si maba ia mate ipedarat, icidahken ras imonoken man si nterem ras anak kuta kerna anak ndai, janah ikatakendilaki ntah diberu anak e. Si ngalakoken lapahen enda e me anak beru, ilakoken i pendawanen, alu ikelokoi dagangen ntah uis, gelah ola ngidah kalak kerina. Si bagenda ilakoken, nina kalak Karo gelah ola pagi sempat jadi, page ntah jaung lanai nggit rumpah i juma erbahanca jelma si nterem lanai man. Megati ka pe si bagenda, mayatna itutungi, si nikataken "IPECIHO".

4. MATE SADA WARI
Mate rempet, labo penakiten. Mate erkiteken ibunuh, erkiteken bencana/musibah... Ibas si bagenda, nina kalak Karo, megati lit si rulah, lit si erdilo ntah lit si mindo, e me kramat kerangen/deleng/kayu mbelin/batu mbelin/taneh/lau maler...rsd.

Dikutip : Dari Berbagai sumber