Tuan Bagunda Raja Ras Manuk Si Nanggur Dawa

Lit me kap ndube sekalak diberu si ergelar Inang Seribu Tua. Tubuh ndube sada anakna dilaki, igelarina si Tuan Bagunda Raja. La lit si metehsa ise bapana, e maka ikataken me ia kesusuren Dewa.

 Tande tahunna, enggo mbelin kulana, isuruh nandena me iya erjabu. "Uwe, tapi erdemu ras impalku anak mama nateku." nina Tuan Bagunda Raja Lit kepe waluh mamana si ngiani Desa Siwaluh, tapi si enda ndube ibuniken nandena, la turikenna man anakna. Amin pe ibuniken nandena kecibalen mamana e, dungna ieteh Tuan Bagunda Raja kap maka lit mamana waluh kalak. E maka isuruhna me Manuk Si Nanggur Dawa milihi impalna gelah jadi ndeharana. Ipilihna me anak mamana si nu Purba. Impalna si pitu nari lit kerina cacatna. Erjabu me iya ras anak mamana si nu Purba. Tading iya i rumah mamana. Ndekah iya tading i rumah mamana. Dungna berkat me iya kurumahna i kayangen. Mamana la meteh ia lawes nadingken rumah mamana e. Enggo iya tading i kayangen, lalap la lit anak ipupusna. E maka ijumpaina me sekalak guru, isungkunna engkai maka lalap la lit anak ipupusna man guru e. "Lawes kam ndube la erkata nadingken rumah mamandu, emaka lalap la lit pupusndu. Gundari mindo ialemi lah kam nandangi mamandu." nina guru "Uwe, guru." nina ngaloi Berkat me ia ras ndeharana ndahi mamana ku Purba guna mindo ialemi. Enggo iya mindo ialemi, mamana pe enggo ngalemi ia, e maka mulih iya ku kayangen. La ndekahsa, mehuli kula ndeharana. Ercakap me ia ras anakna si bas bertin denga. Ikataken anakna me maka ia anak dilaki, gelarna denggo Tuan Paduka Aji si tading i banua teruh. Tande bulanna, tubuh me anakna dilaki, igelarina Tuan Paduka Aji. La ndekahsa, mehuli ka me kula ndeharana. Bagi si ndube, ercakap ka me ia ras anakna si bas bertin denga.  Ikataken anakna me maka ia anak dilaki, gelarna denggo Tuan Banua Koling si tading i banua tengah. Tande bulanna, tubuh ka me anakna dilaki, igelarina Tuan Banua Koling. Mbelin anakna si dua. Tuan Paduka Aji tading i banua teruh, Tuan Banua Koling tading i banua tengah. Ibas sada wari, isuruh bapana Manuk Si Nanggur Dawa nungkun Tuan Banua Koling kerna perjabunna. Berkat me Manuk Si Nanggur Dawa ndahi Tuan Banua Koling. "Ndigan atendu erjabu nina bapandu, Tuan Banua Koling?" nina "Di kerna si ena, nande ras bapa kap si mutuskensa." nina Tuan Banua Koling Mulih me Manuk Si Nanggur Dawa ku kayangen, ipesehna kata Tuan Banua Kolin man Tuan Bagunda Raja ras ndeharana. E maka iban nandena me sada gana-gana, itamana ibas sada kotak, isuruhna itaruhken Manuk Si Nanggur Dawa man Tuan Banua Koling. Itaruhkenna me kotak e man Tuan Banua Koling. "Kotak e la banci ibuka di lenga seh empat wari." nina Manuk Si Nanggur Dawa La saber ukurna, e maka lenga pe seh empat wari, enggo ibukana kotak e. Mintes salih jadi begu gana-gana ndai. Kenca si e, reh ka Manuk Si Nanggur Dawa naruhken kotak tenah nandena. Seri ras si ndube, la banci buka di lenga seh empat wari. E pe la saber ukurna, ibukana kotak e so pe seh warina. Minter salih jadi Sidangbela gana-gana ndai. Sekali nari, reh ka Manuk Si Nanggur Dawa naruhken kotak tenah nandena man Tuan Banua Koling. Seri denga ras si ndube, la banci buka di lenga empat wari. Sekali enda, ibukana kotak e pas bas warina, salih me gana-gana ndai jadi sekalak diberu si mejile. Diberu e me si jadi ndeharana. Kenca iya erjabu duana, i kayangen mehuli kula nandena. Ercakap-cakap ka me Tuan Bagunda Raja ras anakna si bas bertin. Ikatakenna man bapana maka ia anak diberu, gelarna denggo Dibata Kaci-Kaci, ia me pagi si jadi juru dame turangna si dua. I banua tengah, mehuli kula ndehara Tuan Banua Koling. Tande bulanna tubuh me anakna, lit buena sipuluh empat kalak, pitu dilaki, pitu diberu. Kerina anakna e kisat erdahin, perban si e, merawa me Tuan Banua Koling, ibunuhna me kerina anakna e. Kenca mate, salih me anakna si dilaki jadi matawari, si diberu salih jadi bulan. E maka seh kal lasna tupung suari, seh kal bergehna tupung berngi. Ibinasakenna me enem matawari ras enem bulan. E maka tading me sada matawari ras sada bulan. Mehuli ka kula ndeharana, tande bulanna, tubuh anakna waluh, dilaki kerina. Keleng kal atena kerina anakna e. Tande tahunna, enggo mbelin kula anakna kerina. Anakna si waluh e me si ngiani Desa Siwaluh, si njagai doni ras kerina isina.
Info : Dari berbagai sumber