Jambor Sebayang "Siwah Binangun"

Enggo Kenca Nini Raja Lambing, i bebasken ibas bayangen Raja Pencawan nari, erjabu ia ras beru Perangin-angin Kuta Buloh, maka tuboh telu anakna. Sada dilaki dua diberu. Anak sidiberu: sada i perdemui Ginting Tampune, ras sada nari iperdemui Brahmana Mergana. Sada anak dilaki emkap Sebayang Mergana Generasi Pemena, erjabu, i pupusna telu anak dilaki, enda me Sebayang Mergana generasi peduaken. Enggo me nini si telu enda erban rumahna tersada ?, maka enggo lit  penggelaren rumah tah jamborna ?. Enggo nge ia ngasup, tah pe engkai maka ban na tersada rumahna. Adi nai, tentu rumah enda, rumah adat, silang-langna rumah si empat jabu.  

Tahun 1980-an, kenca dung sekolah SD i kuta Perbesi, lawes kami nadingken kuta guna sekolah. Emaka ibas wari libur kenca, mulih ka ku kuta. Seh i Rumah Jahe, kuta Perbesi, enggo kenca iamparken tas bas tengah jabu, nina Nande Beru Ginting ndube, “ Ente ku Rumah Bapam gugong ah ko, Bapam  rumah berneh ah, Bapam sadah, Bapam  sade, ngata ko maka engko mulih ku kuta”.  E ma berkat ka, ngata enggo mulih, man kerina tutor er bapa, kerina bapa mekacar, nungkuni uga kerna persekolah ma lenga bo molah-olah. Kenca sade, ku kede, jumpa ras abang-abang tah pe tegun senina, lit si ngajak ngkawil, erburu tah pe muat tengguli. La lit bedana, kerina tegun bapa akap kami senina kandung bapa, bagepe senina la lit bedana seri ras senina kandung. Adi turang beru Bayang, kerina melias, adi tegun agi kerina la erdobahen mehamat. Emaka adi sungkuni kalak kami, apai seninandu tahpe turangndu nina, kerina sada kesain kataken kami, sebab la kin teh kami bedana. Endam nilai kekeluargaan Sebayang Mergana.

Emaka ngolih ka kita ku nini si telu nda, adi la perban la bancina, ngidah riahna kapna ersenina, adi telu dengang ia, labo akap kami banna  rumahna tersada. Emaka ninta, bas nini si telu enda lenga lit rumah/jambor penggelaren. Teluna nini enda mupus anak di laki tertelu ka, emaka enggo siwah Sebayang Mergana, endam Sebayang Mergana generasi peteluken. Enggo melala Sebayang mergana, emaka mulai me ia berbahan rumah. Tiap-tiap rumah bagi biasana rumah kalak Karo si nai, lit ciri khasna simulihi tangkel jadi gelarna, lit si melige potongenna, lit arah berneh, lit ka simeganjang, tahpe jambor rumah e hiasenna bagi batang lada,  tahpe melala merpatina. Emaka i gelari me rumah e : Rumah Tersek, Jambor Lada, Jambor Berneh, Rumah Derpih, Jambor Merpati, Jambor Kedundong, Rumah Lige, Jambor Ganjang, Ulun Jandi. Janah tandana ia ersada ibahanna Jamborna Sada, siwah binangunna, ngatakenca ia siwah erseniina. Endam Jambor si nigelari “Jambor Siwah Binangun”.  Sebayang si siwah sada jambor.

 

Info : dari berbagai sumber